Gjashtë të burgosur palestinezë nga një burg izraelit i sigurisë së lartë u raportuan se u arratisën, përmes një tuneli të hënën. Lajmi është konfirmuar edhe nga policia, ndërsa mediat izraelite raportuan se ata ishin anëtarë të grupeve militante palestineze.
Pesë nga të arrestuarit thuhet se janë anëtarë të Xhihadit Islamik dhe i gjashti ish-komandant i një grupi militant të lidhur me Fatah.
Të gjashtë u mbajtën në të njëjtën qeli dhe gërmuan një tunel për të shpëtuar nga burgu Gilboa në Izraelin verior.
Forcat izraelite të sigurisë po kërkojnë për të arratisurit, të cilët besohet se po përpiqen të hyjnë në Rripin e Gazës ose të shkojnë në kufirin me Jordaninë.
Kryeministri izraelit Naftali Bennett e quajti incidentin “shumë serioz” ndërsa grupet palestineze mirëpritën arratisjen e gjashtë të arrestuarve.
