Ka një emër të ri për mesfushën e Juventusit. Bardhezinjtë, të vetëdijshëm se duhet të përforcojnë mesfushën që në janar, kanë vënë në shënjestër Aurelien Tchouameni, 21-vjeçari i Monakos, prej kohësh në radarin e klubeve më të mira evropiane, veçanërisht atyre angleze. Në Angli, megjithatë, bardhezinjtë mund të gjejnë mjetin e duhur për të mposhtur konkurrencën dhe për t'i siguruar Max Allegrit mesfushorin dinamik dhe fizikisht të fuqishëm që tekniku ka kërkuar. Pronari i ri i Newcastle në fakt ka bërë kontaktet e para me Aaron Ramsey dhe do të ishte gati të ofrojë një marrëveshje trevjeçare për lojtarin. Nëse negociatat janë të suksesshme, Juve do të heqë qafe një pagë të rëndësishme (8 milionë në sezon deri në vitin 2023) dhe mund të vihet në kërkim të lojtarëve të rinj.
Nuk është puna vetëm te Ramsey, megjithatë, sepse Monako, pavarësisht se është gati për të vlerësuar ofertat, nuk ka ndërmend të lërë një nga talentet e tij më të mirë të largohet për më pak se 35 milionë, një shifër shumë impenjative dhe, në këtë moment, ndoshta jashtë mundësive për bardhezinjtë. Në këtë pikë, merr prioritet ideja e përpjekjes për të përfshirë në negociata, sipas asaj që bën të ditur Gazzetta dello Sport, Weston McKennie, një lojtar që mund të jetë me interes për klubin e Principatës.
Alternativat tashmë janë gati. Nga Witsel, në radarin e Juves prej vitesh tashmë, tek Donny van de Beek, në dalje nga Manchester United dhe për të cilin kanë filluar kontaktet e para me menaxherin e hollandezit.
