Nuk është vetëm cështja e një triumfi në derbi, ajo vetëm sa konsolidoi pozitën e Tiranës si skuadra pretendente numër 1 për titullin kampion në këtë edicion. E nuk është fare eufori e momentit, skuadra e Orges Shehit ka dhënë disa prova, madje më shumë se të gjithë skuadrat e tjera të kampionatit e ka dalë prej tyre me shifra të jashtëzkonshme. Në vitin e titullit nuk bëhej fjalë, sepse e nisi sprintin shumë vonë, por starti i bërë nga bardheblutë në gjashtë javët e para të kampionatit, përfshirë edhe vajtje ardhjen e raundit të parë të Kupës së Shqipërisë evidenton një tregues shumë domethënës: bardheblutë kanë vetëm dy barazime e gjashtë fitore në 8 takimet e para sezonale dhe është skuadra e vetme e pamundur në Shqipëri në të dyja kompeticionet, apo edhe e vetmja me kolonën e humbjeve zero në Superiore.
12 gola të shënuar në 6 sfida për një mesatare me dy gola për ndeshje e bëjnë formacionin e Shehit të jetë fare pranë të qenit sulmi më i mirë i kampionatit, i kaluar për momentin vetëm me një gol nga Kukësi e Vllaznia. Mbrojtja ndërkohë e ka arritur statusin, duke lejuar një gol për ndeshje, ose 6 në 6 takime, në një nivel me Teutën e Partizanin, por aty ku nuk ka fare krahasim është plusvalenca që evidenton një +6 mes aktivit e pasivit të realizimeve, të paarritshëm nga asnjë tjetër. Kështu, Shehi jo vetëm ka gjetur stabilitetin e skuadrës së tij, jo rastësisht dy barazimet kanë ardhur në tre javët e para, por është treguar më i fortë se dëmtimet e madje edhe Covid.
Ikonike fitorja e arritur përballë Teutës kampione e në fuqi, pa 4 nga titullarët më të rëndësishëm që vuanin pasojat e virusit. Tani, një tjetër përgjigje erdhi në derbin e kryeqytetit, suksesi i parë në ndërqytetase si trajner për Shehin e që ka injektuar tek bardheblutë një dozë besimi që do ti vlejë shumë bardhebluve në ndjekje të një titulli, në rrugën e të cilit Tirana e targuar Shehi udhëton shumë shpejt për të tjerët….
