Lajmi se Sergio Aguero duhet të varë këpucët për shkak të aritmisë nga e cila vuan ishte një tronditje për botën e futbollit. Gazetarja argjentinase Pia Shaw zbuloi përmbajtjen e një bisede me sulmuesin e Barcelonës. "Jam mirë, mirë... Thashethemet janë të tmerrshme - shkruan Kun - Kjo gjëja e zemrës kërkon kohë, të paktën 6 muaj. Unë jam 33 vjeç dhe duhet të pres 6 muaj, plus tre stërvitje për t'u kthyer në fushë. Epo është e komplikuar. Duhet të qendroj jashtë 9 muaj, gati një vit, prandaj spekulojnë për tërheqjen time. Por nëse më thonë se duhet të ndaloj do e bëj, por më parë pres rezultatet”.
"Tani po pres të bëj testet, nuk kam kryer ende as të parin - shpjegoi Aguero - Ndaj për një javë do të bëj kontrollet në klinikë dhe do të shohim hapat që duhen ndjekur. Por ajo që flitet është e çuditshme, nuk e di…”.
Brenda disa javësh, duhet të jetë bërë më shumë qartësi për gjendjen aktuale shëndetësore të argjentinasit, më saktë nëse aritmia kardiake nga e cila vuan është vërtet malinje. "Ndërkohë vazhdoj me planin tim të rikuperimit. Më pas do të shohim se çfarë do të jetë më e mira. Unë u shtrova në spital për pesë ditë, më kontrolluan dhe më pas kam qendruar pushim deri në kontrollin e parë. Kështu që tani është çështje durimi. Shkova në Andorra për tre ditë, isha shumë nervoz për gjithçka që kishte ndodhur. Javën tjetër ose atë pasuese do të shohim se çfarë do të bëjmë, varet se çfarë do të më thonë".
