Një humbje e një barazim në dy daljet e fundit e kanë reduktuar në vetëm një pikë avantazhin e Tiranës nga ndjekësit, duke shtuar presionin mbi bardheblutë, që ndjejnë nga pranë dihatjen e Kukësit. Mbi këtë pikë ka punuar me të tijtë Orges Shehi, një që luhatjet e futbollit i njeh mirë e që po mundohet ta bëjë skuadrën ta kapërcejë me sa më pak kosto. Problemi është se Redon Xhixha nuk ia del të jetë, duke e lënë jetim Tiranën nga sulmuesi më në formë. Kurbinasi ka ndjerë përsëri shqetësim dhe nuk e ka patur të mundur të dilte në stërvitje, gjë që e përjashton në mënyrë absolute nga formacioni për ndeshjen me Egnatian.
Sipas stafit mjekësor, Xhixha duhet të dalë në stërvitje javën e ardhshme, por mbetet për tu parë si do të përgjigjet fiziku i tij që Shehi ta llogarisë në forcë për ndeshjen në shtëpi kundër Kastriotit në 7 dhjetor. Kështu, pa alternativa, ashtu si e ka shpjeguar edhe vetë, në sulm janë të sigurtë Seferi e Ngo’o. Anglezi vazhdon të vuajë pasojat e Covid, por është duke shtrënguar dhëmbët, për të ndihmuar skuadrën dhe për të rigjetur formën. Me Bekajn e katërshen e konsoliduar defensive Tosevski, Najdovski, Hoxhallari e Ismajlgeci, dilemat e teknikut janë vetëm një: të luajë me një mesfushor më shumë për ti dhënë asistencë Totre, Limajt e Hotit me xholin Toli, apo ti japë startin Gjumsit, që nuk është se ka zhgënjyer, për tridhëmbëshin e zakonshëm ofensiv.
Behirachte në anën tjetër ka rikuperuar dëmtimin dhe është stërvitur me grupin dhe në bazë të formës, Shehi mund ta preferojë në qendër të mbrojtjes, port a spostuar Najdovskin më përpara. Duhet patur parasysh se Egnatia në kryeqytet i ka marrë barazimin 25 herë kampionëve dhe pas dy ndeshjeve pa fitore, Shehi nuk dëshiron aspak që ti ndodhë përsëri.
