Një ndeshje me polemika ajo mes Kukësit dhe Laçit e përfunduar 1-2 në “Air Albania”. Edhe më shumë për golin e anulluar dhe penalltinë e humbur nga Hila në fundin e ndeshjes, që tensionoi situatën për shkak të tentativës për konfrontim mes trajnerit të Bluve, Diego Longo, dhe pjesëtarëve të stafit të kurbinasve. Festimi i një prej pjesëtarëve të stafit të Laçit, kur Hila gaboi nga pika e bardhë, nuk i pëlqeu Longos i cili u sul drejt pankinës kundërshtare dhe i kërkoi gjyqtarit të katërt që të ndërhynte duke e cilësuar si sjellje ofensive: "Mori përgjegjësinë e gaboi, kaq është e gjitha. Nëse kërkoni një përgjegjës për këtë jam unë, mjaft me sulme ndaj lojtarëve apo të tjerëve. Ka 5 muaj që këta njerëz flasin për mbrojtjen tonë" tha Longo pas ndeshjes.
Italiani nuk e fsheh mërzinë për mënyrën si rrodhën gjërat: "Jam i mërzitur e shumë i zhgënjyer, nga kjo situatë duhet të mësojmë. Nëse nuk mësojmë nga kjo humbje, atëherë jemi budallenj. Duhet të mësojmë nga kjo situatë. Ky është gol nuk ka asnjë diskutim. Është gol i rregullt në një dyluftim të drejtë".
Në fund edhe një kritikë pa lojëra fjalësh ndaj Bruno Lulajt, që në rastin e golit të parë të Lacit, bëri një gabim amatoresk duke iu marrë topi nga Guindo: "Nuk kam asgjë edhe me ata që sulmojmë. Dua të gjejmë një balancë e të dimë se kush jemi, Mund të ndodhi që të humbësh ndeshjen. Nuk është faji i mbrojtjes, por se si përballuam ndeshjen, ndaj pësuam dy gola. Ky është një gabim i një fëmije, jo një gabim i mbrojtjes”, tha Longo.
