Tirana fiton ndaj kampionëve në fuqi të Teutës dhe vijon të ruajë shkëputjen nga renditja në Kategorinë Superiore. 2-1 janë imponuar bardheblutë ndaj durrsakëve, në një ndeshje ku në fund rrezikuan që të linin pikët që i kishin fituar me meritë deri në 10 minutat e fundit.
Që në fillim të takimit Tirana u shfaq kërkuese dhe në minutën e 23'-të Totre tregon gjithë talentin e tij me një gjuajtje të shkëlqyer nga jashtë zonës që kalon Qirkon. Bardheblutë administruan rezultatin dhe u mbrojtën mirë, ndërkohë që goli i dytë për ta erdhi në minutën e 68'-të falë një kundërsulmi të Xhixhës që i dhuroi një top Seferit i cili e finalizoi sferën në rrjetë.
Në këtë pikë kryeqytetasit e menduan të mbyllur shumë shpejt sfidën duke ulur ritmin, ndërkohë që Teuta u kthye në lojë duke rrezikuar e duke shënuar me Grudën. Një sfidë që u shoqërua me shumë emocione deri në sekondat e fundit, por suksesi ishte i bardhebluve të cilët morën 3 pikët dhe ruajtën distancën nga Kukësi i vendit të dytë.
