Varianti i ashtuquajtur "Deltakron" i virusit SARS-CoV-2 që u tha se ishte një bashkim i variantit Omicron me atë Delta, mund të jetë rezultat i një gabimi të analizës laboratorike.
Ky është dyshimi që po qarkullon tashmë në komunitetin shkencor.
“24 sekuencat e depozituara nga studiuesit qipriotë janë analizuar mjaftueshëm në detaje: sipas të gjitha gjasave është një artefakt”, - tha studiuesi Marco Gerdol për ANSA.
“Është pothuajse e sigurt që edhe mund të krijohet një variant hibrid midis Delta dhe Omicron sepse fenomenet e rikombinimit janë të njohura dhe tashmë janë vërejtur, për shembull, midis varianteve Alfa dhe Delta”, - nënvizoi shkencëtari.
Megjithatë Leonidos Kostrikis, kreu i Laboratorit të Bioteknologjisë dhe Virologjisë Molekulare në Universitetin e Qipros, në një intervistë me Bloomberg këmbëngul në korrektësinë e të dhënave të tyre.
Ai argumentoi se nuk ka gjasa të jetë gabuar në laborator pasi gjenomet janë analizuar në procedura të ndryshme dhe në më shumë se një shtet. Sipas tij u gjet gjithashtu të paktën një sekuencë e ngjashme nga Izraeli me karakteristikat e Deltacron. ©LAPSI.al
