Dy orë e gjysmë ka zgjatur edhe marrja në pyetje e sekretarit të Përgjithshëm të Partisë Demokratike, Gazment Bardhi nga Prokuroria e Tiranës. Bardhi është thirrur për t'u pyetur në lidhje me protestën e 8 janarit përpara selisë së PD-së.
Një ditë më parë, për 2 orë e 40 minuta ish-kryeministri Sali Berisha qëndroi përballë prokurorëve dhe iu tregoi versionin e tij për protestën ku mbështetësit e Berishës u përplasën me mbështetësit e Bashës. Pas daljes nga prokuroria, lideri historik i demokratëve deklaroi se kishte informuar hetuesit se në seli ka pasur njerëz të armatosur dhe armët u larguan me makinën e kreut të Partisë Demokratike. Ai akuzoi sërish Bashën si peng të Ramës, teksa paralajmëroi edhe një herë protesta të fuqishme.
