Ditët e fundit, Lulzim Basha e ka parë veten në ca situata të sikletshme që do t’ia bënin ditën të vështirë çdokujt. Pavarësisht mëkateve që mbajnë mbi supe, pak politikanë shqiptarë janë gjendur më parë nën breshërinë e sharjeve dhe ofendimeve të rënda në këtë formë. Sapo Lulzim Basha bën të dalë nga makina, njerëz të acaruar në rrugë lëshojnë ofendime dhe thirrje nga më banalet.
Në Fier, ku zhvilloi takimin me mbështetës të tij, situata u acarua mes dy grupimeve të militantëve. Situata do të kishte degraduar në një sherr masiv sikur të mos ndërhynte policia. Video më poshtë:
https://streamable.com/lr66t1
Në fakt, shoqërimi i Lulzim Bashës me policë, kudo që shkon është një fitore e vogël e Berishës, pasi vetë pamja i përshtatet në mënyrë perfekte imazhit si peng i Edi Ramës.
E sikletshme ishte situata edhe këtë të martë për Lulzim Bashën, kur sapo zbriti nga makina dëgjoi sharje dhe ofendime. Dy prej tyre shkuan më tej dhe e qëlluan me vezë ndërsa e quanin “legen” dhe “plehrë”. Video më poshtë:
https://streamable.com/kpifle
Me fishkëllima dhe ofendime e pritën edhe në mbrëmje në hyrje të një hoteli në Tiranë. Brenda e prisnin një grup grash demokrate, por sapo doli nga makina mbi të nisën thirrjet “Basha ik” shoqëruar me sharje të rënda. Nga ana e Bashës nuk pati asnjë reagim të drejtpërdrejtë. Ai thjesht përshëndeti me dorë dhe hyri brenda në hotel me dy gishtat lart. Demokratët e irrituar dëgjuan pastaj një fjalë nga Fatmir Merkoçi, një prej protagonistëve të 20 shkurtit 1991, kur u rrëzua statuja e Enver Hoxhës, aktualisht i padëshiruar në PD.
Video më poshtë:
https://streamable.com/qis2cr
Vendimi për të shfryrë ndaj Bashës në rrugë nuk është spontan. Videot e sharjeve dhe sulmeve verbale janë postuar në rrjetet sociale nga Sali Berisha që ka nxitur më tej mllefin kundër atij, që i rezistoi në 8 Janar.
Që pas asaj dite, Berisha po heziton të shpallë datë tjetër për protestën e radhës. Dështimi i dytë do të ishte fatal për Foltoren dhe ndjekësit e Berishës. Pikërisht për këtë strategjia e lëvizjes anti-Basha është shndërruar në sulme të shkëputura gjysëm-guerile dhe që synojnë diskretitimin e kundërshtarit.
https://streamable.com/yokeeb
Deri tani, Lulzim Basha ka reaguar me qetësi dhe nuk është kundërpërgjigjur me të njëjtën monedhë. Në sallën ku zhvillohej takimi, ai u pa të hynte i buzëqeshur, megjithëse militantët sapo e kishin shanë dhe ofenduar në format më banale./Lapsi.al
