Një nga Asambletë më të pritura, për shkak të ashpërsisë së akuzave e kundërakuzave me të cilën po shoqërohet vigjilja e saj, tashmë ka një datë zyrtare se kur do të zhvillohet. Federata Shqiptare e Futbollit bën me dije se Komiteti Ekzekutiv i FSHF-së në mbledhjen e tij të datës 21.01.2022 në bazë të kompetencave që i jep Statuti i FSHF-së, vendosi të thërrasë Asamblenë e Përgjithshme të Zakonshme Zgjedhore, më datën 02 mars 2022.
Në këtë mbledhje anëtarët e Komitetit të Ekzekutiv të FSHF përcaktuan dhe miratuan edhe rendin e ditës së punimeve të Asamblesë. Punimet e saj do të nisin në orën 10:00, në selinë e FSHF te “Shtëpia e Futbollit” në Tiranë.
