Koha e rikthimit në fushë të Leonardo Spinazzolas po zgjatet përtej parashikimeve. Sipas asaj që u bë e ditur gjatë kontrollit të kombëtares së Italisë nga Andrea Ferretti, doktor i të kaltërve, rikuperimi i anësorit verdhekuq nga këputja e tendinës së Akilit do të ecë më ngadalë se sa pritej, aq sa do të shtynte gjithçka për sezonin e ardhshëm. “Objektivi i arsyeshëm i Spinazzolas është të kthehet në fushë në gusht”, shpjegoi Ferretti disi në mënyrë befasuese.
"Ky është një dëmtim shumë i rëndë për një lojtar - ka specifikuar Ferretti në mikrofonat e Il Diabolico e il Divino -. Historia na mëson se rikuperimi është shumë i ngadalshëm". "E pashë Spinazzolan përsëri pak para Krishtlindjeve dhe ai ishte shumë optimist, madje edhe duke e ditur se nuk do të kthehej së shpejti - shtoi ai -. Por testet në fushë nuk kanë filluar ende."
“Besoj se rikthimi i tij realist është në fillimin e kampionatit të ardhshëm, me perspektivën për të qenë në formë të plotë për Botërorin”, përfundoi mjeku i kombëtares, duke zhdukur shpresat e tifozëve të Romës dhe vetë Mourinhos për ta parë Spinazzolan në fushë në këtë pjesë të dytë të sezonit.
