Qendrim apo jo në krah të FSHF-së dhe presidentit Armand Duka, në kulmin e përplasjeve mes Federatës dhe Kryebashkiakut Erjon Veliaj kjo mbetet për tu parë, por ardhja e Presidentit të UEFA-s, Alexander Ceferin është një paralajmërim i fortë për politikën, të mbajë duart larg futbollit.
Tani është zyrtare e konfirmuar edhe nga FSHF: kreu i qeverisë së futbollit europian do të zhvillojë një takim në ora 15:00 me Kryeministrin Edi Rama dhe më pas do të pritet në takim nga Presidenti i FSHF-së, Armand Duka, ku do të diskutohet për problematikat e incidenteve të fundit lidhur me procesin zgjedhor të FSHF-së dhe gjithashtu në lidhje me organizimin e finales historike të UEFA Europa Conference League në stadiumin “Air Albania” më 25 maj.
Ndonëse përflitej se Ceferin duhej të mbërrinte ditën e hënë, kjo nuk u arrit për shkak të agjendës së tij të ngjeshur. Nuk dihet ende nëse Ceferin do të mbajë ose jo një qëndrim në kulmin e betejës përpara zgjedhjeve të Asamblesë së Përgjithshme të FSHF-së, e cila duket e tensionuar. Nga njëra anë flitet për manipulim të zgjedhjeve për Shoqatat Rajonale dhe nga tjetra flitet për një ndërhyrje të politikës në këtë proçes zgjedhor.
