Pas gati 20 vitesh konkurence për trofe, Topa të Artë dhe titullin e futbollistit më të mirë në histori, Cristiano Ronaldo dhe Lionel Messi mund të luajnë së bashku sezonin e ardhshëm. Sipas asaj që bën të ditur Daily Mirror, Zinedine Zidane, ëndrra e sheikëve të PSG, ka vendosur një kusht të panegociueshëm për të pranuar të ulet në pankinën kryeqytetase: blerjen e Cristiano Ronaldos, i cili do të largohej nga Manchesteri pa shumë keqardhje.
Edhe pse titullin në Ligue 1 e ka praktikisht në xhep dhe skuadra është në garë të plotë për Champions League, aventura e Mauricio Pochettino në Paris i ka muajt e numëruar. Objektivi i madh i sheikëve, jo shumë i fshehur, është Zinedine Zidane, i interesuar edhe për pankinën e Francës. Zizou, sipas prapaskenës që zbulojnë në Angli, ka vendosur kushtin për ardhjen në Paris të Cristiano Ronaldos, me të cilin te Madrid ka fituar gjithçka. Një blerje që, në fakt, do ta bënte më pak të hidhur lamtumirën e Kylian Mbappé, tashmë i premtuar te Real Madrid.
