Diplomati rus, Konstantin Gavrilov, është shprehur në një deklaratë se Moska kërkon prej NATO-s të deklarojë që nuk do ta lejojë Ukrainën në gjirin e saj.
“Rusia do të insistojë që NATO të shpallë publikisht se Ukraina nuk do të jetë kurrë pjesë e aleancës”, u shpreh ai.
Komentet e Gavrilov vijnë ndërsa ministrat e mbrojtjes të NATO-s do të takohen në Bruksel, në një takim që do të zgjasë dy ditë. Rusia ka kërkuar vazhdimisht garancinë e fuqive perëndimore që Ukraina të mos jetë pjesë aleancës.
Nga ana tjetër, NATO thotë se Ukraina, si një komb sovran duhet të jetë e lirë të vendosë për aleancat e saj të sigurisë.
Ukraina është aktualisht një “vend partner”, që do të thotë se mund të jetë pjesë e NATO-s në një të ardhme.
Ndërsa presidenti rus, Vladimir Putin, pretendon se fuqitë perëndimore po përdorin aleancën për të shfuqizuar Rusinë. Ai ka kërkuar që NATO t’i japë fund aktiviteteve të saj ushtarake në Europën Lindore.
