Gjykata e Shkodrës ka vendosur masën e sigurisë 35 ditë arrest në burg për Eduart Kësolla, 30-vjeçari i cili akuzohet për vrasjen e Prek Tonaj në Shkodër. 47-vjeçari Tonaj u vra me armë zjarri në 13 shkurt të këtij në fshatin Grudë e Re në Shkodër. Mendohet se ngjarja ka ndodhur për motive gjakmarrje. Ngjarja e rëndë ka ndodhur pak metra larg shtëpisë së viktimës, i cili kishte shkuar për të konsumuar diçka në brendësi të një lokali. Vetëm pak minuta me vonë, një person i maskuar është futur brenda në lokal, ka kërcënuar klientët e tjerë që të mos lëvizin. Autori më pas i është afruar 47-vjeçarit dhe e ka qëlluar me armë duke e lënë të vdekur në vend.
Në seancën gjyqësore, Kësolla nuk ka folur, ndërsa avokati mbrojtës i tij kërkoi që prokuroria të dorëzojë prova evidente që implikojnë 30-vjeçarin. Ndërkohë, prokuroria dyshon se vrasja ka si shkak gjakmarrjen, pasi në të kaluarën, familjes Tonaj, i ishin vrarë edhe dy djem të tjerë. Për njërin prej djemve familja ka marrë hakun në 1996, duke vrarë autorin.
