Presidenti turk, Recep Tayyip Erdogan, denoncoi vendimin e homologut Vladimir Putin për të njohur pavarësinë e dy krahinave separatiste në Ukrainë duke e quajtur “të papranueshëm”. AFP-ja raporton se Turqia ka kundërshtuar njohjen e pavarësisë së Donetsk dhe Luhansk nga Rusia. Erdogan gjithashtu theksoi angazhimin e Turqisë për të ruajtur unitetin politik dhe integritetin territorial të Ukrainës, dhe u bëri thirrje të gjitha palëve të respektojnë ligjin ndërkombëtar.
“Vendimi i Rusisë për të njohur të ashtuquajturat Republika të Donetskut dhe Luhanskut është kundër Marrëveshjes së Minskut”, tha Erdogan për gazetarët, gjatë një udhëtimi në Senegal të martën.
Presidenti turk u bëri thirrje të gjitha palëve që të tregonin vetëpërmbajtje dhe deklaroi se Turqia është e hapur për të marrë pjesë në samitin e propozuar nga Presidenti i Ukrainës, Volodymyr Zelensky.
