Me të mira e më të këqija. Me këtë mënyrë, José Mourinho është duke menaxhuar Felix Afena-Gyan. Pasi e bëri të debutojë në Serie A dhe e mori nën mbrojtjen e tij, trajneri portugez e "degëdisi" sulmuesin 19-vjeçar te të rinjtë, për një natë të kaluar në diskotekë deri në agim, pavarësisht disa problemeve me ijën, që e detyruan të humbiste ndeshjen me Spezian.
Një “naivitet” që Special One nuk e ka pëlqyer dhe e ka ndëshkuar menjëherë me një “ulje kategorie” momentale, në unitet me klubin, për ta pjekur lojtarin dhe për ta bërë të kuptojë prioritetet e një futbollisti profesionist. Detaje që Mou i njeh në mënyrë të përsosur dhe që Felix duhet t'i mësojë shpejt nëse dëshiron të vazhdojë të qëndrojë në ekipin e parë, të rritet dhe të koleksionojë paraqitje të tjera në Serie A. Sidomos nëse në pankinë është dikush si Mourinho që jep shumë, por gjithashtu kërkon po aq nga lojtarët e saj.
