Ukraina dhe Rusia do të zhvillojnë sot raundin tretë të bisedimeve, me synim ndaljen e luftës në Ukrainë.
Më herët ishte vendosur që bisedimet mes vendeve të zhvilloheshin në orën 13:00, ndërsa aktualisht është njoftuar se është shtyrë orari i bisedimeve të cilat pritet të mbahen në orën 16:00.
Një delegacion rus ka mbërritur në qytetin bjellorus të Brest për bisedime me negociatorët ukrainas, teksa lufta ka hyrë këtë të hënë në ditën e 12-të.
Palët janë takuar edhe dy herë të tjera, qëkur Rusia ka nisur pushtimin e Ukrainës më 24 shkurt, por pa ndonjë rezultat konkret.
“Raundi i tretë i bisedimeve do të zhvillohet të hënën”, ka thënë dy ditë më parë negociatori ukrainas, David Arakhamia.
Negociatori rus, Leonid Slutsky, ka thënë se “raundi i tretë mund të zhvillohet në ditët në vijim” dhe se “ka gjasa të zhvillohet të hënën”.
Dy raundet e para të bisedimeve janë mbajtur në Bjellorusi. Më shumë detaje për raundin e sotëm nuk ka ende.
