Kryeministri Rama ka dalë në një komunikim live në Facebook për të shpjeguar detaje të asaj që ai e quajti “paketa e Rezistencës” me qëllim përballimin e pasojave të krizës nga rritja e çmimeve. Në fjalët e kryeministrit, ky plan do të shërbejë për të përballuar pasojat e krizës globale energjetike si edhe të luftës në Ukrainë mbi çmimet, ku në vendin tonë kanë pësuar një rritje të lartë.
Në fillim të komunikimit, kreu i qeverisë tha se i vjen turp që Shqipëria është i vetmi vend i NATO-s që proteston për pasojat e luftës në Ukrainë. Në vijim të reagimeve të mëparshme, Rama ka shpërthyer ashpër edhe ndaj protestave në vend dhe veçanërisht ndaj asaj të sotmes duke thënë se po zhgarravitet e githë Shqipëria në sytë e botës duke sajuar fakte të paqena.
