Katër shqiptarë janë vënë nën hetim nga autoritetet italiane pasi akuzohen për financim të veprimtarisë terroriste. Këta shtetas dyshohen se kanë mbledhur dhe kanë dërguar para për veprimtarinë terroriste të imamit të një xhamie në Kavajë, Genci Balla, i dënuar me 17 vite burg për rekrutimin e dhjetëra luftëtarëve të dërguar në Siri. Në arrest shtëpie kanë përfunduar Yljan Muca, 31 vjeç, Roland Leshi, 37 vjeç, Elsio Ramku, 33 vjeç, Roland Belba, 37 vjeç, banues në Bari, Adelfia dhe Rutigliano.
Mediat italiane kanë zbardhur skemën e funksionimit të grupit. Ka qenë 31-vjeçari Muça promotori i nismës së grumbullimit të parave, Leshi dhe Ramku kishin rolin e ndërmjetësit dhe Belba, kunati i Muçës, ishte përgjegjës për transferimin e tyre. Hetimet e policisë italiane janë të bazuara në teknikat moderne të monitorimit të komunimit në web, të cilët kanë identifikuar katër shqiptarët që mbështesnin propagandën xhihadiste dhe kanë gjetur prova si shpërndanin komunikatat në dokumente të përkthyera në shqip të ish-liderit të Shtetit Islamik Abu Bakr Al Baghdadi e zëvendësuesit të tij Ebu Ibrahim El Hashimi El Kureshi. Dokumentet në shqip redaktoheshin nga imami shqiptar i dënuar, Genci Balla. Faktet e zbuluara datojnë në periudhën maj-korrik 2020.
