Miqësorja e dytë e Shqipërisë prodhon rezultat më të mirë, por impakt më të dobët. Pas humbjes 2-1 në Spanjë, kuqezinjtë nuk shkojnë më shumë se 0-0 kundër Gjeorgjisë në Air Albania, që rrit serinë e ndeshjeve pa humbje të skuadrës së Sagnol, ndaj Shqipërisë, në 6 ndeshje.
Të pamundur prej 17 vjetësh gjeorgjianët, që vazhdojnë të mbeten të tillë edhe pas kësaj miqësore, nuk është se i shkaktuar probleme skuadrës së Rejas dhe patën vetëm dy raste në 90 minuta, një në cdo pjesë loje, por në ato episode mund të bënin keq. Shqipëria tregoi gjithë limitet e saj në fazën ofensive: të aftë për tu mbrojtur, edhe falë kualitetit të lartë të treshes difensive, e gjitha Serie A, por makinozë kur vjen puna për tu sulmuar, me një Broja krejtësisht në hije.
Tekniku italian kishte ndryshuar shumë në raport me ndeshjen me iberikët, por skuadra e tij vuajti shumë impulset e Balliut (mbeti në Spanjë, bashkë me Baren e Uzunin) dhe inteligjencën filtruese të Bares. Nga minuta e parë Asllani u mundua ta zëvendësonte, me kontributin edhe të Gjimshitit, të shndërruar disa herë në sugjerues me vertikalizime që mund të hapnin punë. E megjithatë, bëmë shumë pak raste në pjesën e parë e dicka më shumë në të dytën, kur hyri Cikalleshi.
Sulmuesi ishte tepër agresiv në luftën për topin dhe në sulmin drejt zonës. Atë që prisnim nga Broja e bëri pikërisht Cika, që krijoi edhe rastin më të mirë të ndeshjes me një veprim spektakolar, kur dribloi dy herë në minutën e 59 mbrojtësin, me goditjen që kaloi ngjitur me shtyllën. I tij edhe asisti për Vrionin në të 67, por devijimi i sulmuesit në pronësi të Juventus nuk përfundoi në rrjetë. Në fund një 0-0 që nuk jep asnjë përgjigje, me kuqezinjtë e Rejas që bënë mirë prapa (edhe pse ato rreziqe në goditjet e Kazaishvilit dhe Kvekveskirit duheshin evituar) e lanë për të dëshiruar përpara. Por për të fituar, dikush duhet të shënojë e Reja e di mirë këtë...
