Frikë e madhe për lojtarin e Lacios, Raul Moro. Sulmuesit 20-vjeçar spanjoll iu grabit makina në orët e vona të së enjtes, teksa po udhëtonte së bashku me të atin, në Grande Raccordo Anulare në Romë. Sipas rikonstruktimit të ngjarjes nga policia, rreth orës 23 një bandë prej katër personash, që u shtirën si policë, ndaloi Mercedesin e futbollistit dhe pasi rrahën të dy personat në makinë, morën në zotërim mjetin. “Ai është mirë, gjithçka është në rregull, duam të sigurojmë të gjithë ata që kanë lexuar lajmin”, tha menaxheri i komunikimit i bardhekaltërve, Stefano De Martino.
Menjëherë pas kësaj keqbërësit u larguan. Nga ana tjetër, dy viktimat e sulmit janë transportuar në spitalin Casilino. Makina e braktisur u gjet më vonë në Castel Giubileo. Mbi cështjen është vënë në punë ekipi lëvizës, policia rrugore dhe stacioni policor në Fidene.
