Trajneri i Bayern Mynih, Julian Nagelsmann ka kritikuar ashpër Freiburgun për apelimin e bërë prej tyre pas humbjes 4-1 në Bundesliga në fundjavë, pasi kampionët gjermanë luajtën për 18 sekonda me 12 lojtarë, pas një zëvendësimi të kryer jo si duhet. "Nga pikëpamja personale nuk arrij ta kuptoj se çfarë po bën Freiburg, sepse ata nuk do të kishin shënuar dy gola në 18 sekonda ose ndoshta një. Personalisht nuk do ta kisha bërë sepse nuk besoj se duhet përdorur një gabim i palës së tretë për të marrë pikë, ndoshta për shkak të presionit nga tifozët ose sponsorët. Nuk e di nëse mund ta kesh shpirtin të qetë nëse luan në Evropë për tre pikë që nuk i ke fituar në fushë. Unë nuk do të isha shumë i lumtur. Kështu që unë do t'i kisha komunikuar qartë klubit se nuk duhet të apelojmë".
VENDOS FEDERATA - Bayern luajti për një kohë të shkurtër me një lojtar më shumë kur bëri një zëvendësim të dyfishtë në minutën e 86', kur në tabelën elektronike u shfaq numri i vjetër i Kingsley Coman dhe francezi nuk doli nga fusha. Federata gjermane e futbollit tani do të vendosë për rezultatin e ndeshjes, por nuk është caktuar një datë. Bayern kryeson Bundesligën me nëntë pikë ndërsa Freiburg, i pesti, është tre pikë nga vendi i fundit në Champions League me gjashtë ndeshje të mbetura.
