Momente drithëruese gjatë ndeshjes Preston-Blackpool në Championship, të luajtur të martën në mbrëmje. Portieri i miqve Daniel Grimshaë në fakt mbeti i palëvizur në tokë pas një kontrasti të ashpër me një nga sulmuesit e vendasve. Ndeshja u ndërpre për më shumë se 10 minuta, ku lojtarët dhe publiku mbetën pa frymë në pritje për të mësuar mbi gjendjen e portierit.
Ishte minuta e 20 e pjesës së parë të ndeshjes së Championship mes Preston dhe Blackpool, kur një përplasje loje përfshiu portierin e miqve Daniel Grimshaë dhe sulmuesin vendas Cameron Archer. Ky i fundit e goditi me gju në kokë portierin kundërshtar, i cili u rrëzua menjëherë përtokë. Duke kuptuar menjëherë ashpërsinë e goditjes, stafi mjekësor i Blackpool nxitoi në fushë për t'i dhënë ndihmën e parë 24-vjeçarit, i rritur futbollistikisht te Manchester City.
Stafi mjekësor i klubit i vendosi shpejt një maskë oksigjeni fatkeqit Grimshaë, i cili ishte shtrirë praktikisht i palëvizshëm në fushë në stadiumin Deepdale. Pas më shumë se dhjetë minutash trajtim, portieri u vendos në barelë dhe u dërgua në dhomat e zhveshjes mes brohoritjeve të tifozëve të të dyja skuadrave. Portieri më pas u transportua me një ambulancë urgjente në spitalin Royal Preston.
