“Në qoftë se e kam kaluar sot cakun i kërkoj ndjesë të gjithëve. Zemërimi ishte sepse në minutën e 99-të, ishte një anësore që ishte faull. Për këtë u xhindosa me arbitrin, po ta akordonte faull mbaronte loja. Një faull më ka hequr 2 pikë. Nuk duhet të jem i fiksuar mbas këtyre problemeve, por është e vërtetë”. Elvis Plori tenton ta frenojë zemërimin për barazimin në minutën e 99 që fiksoi barazimin 1-1 me Teutën, duke i hequr Vllaznisë së tij fitoren. Tekniku megjithatë nuk gjen justifikimin vetëm tek arbitri, por sqaron edhe pikat e dobëta të të tijve: “Në momentin që futesh në fushë nuk mendon për rivalët. Duhet të jemi më të përqëndruar. Ka shumë ndeshje që nuk kemi forcë të mbajmë rezultatin”.
Tekniku shkodran, ende pa fitore në krye të skuadrës, por që e ka kualifikuar Vllazninë në finalen e Kupës, është ndalur edhe tek largimi i një lojtari të rëndësishëm si Diagne, duke sqaruar situatën: “Nuk kemi dashur që të largohej. Një ditë para ndeshje me Partizanin, u largua papritur nga stërvitje. Një profesionist nuk i bën ato gjeste të tilla. Shpresoj që të mos ketë probleme familjare dhe personale. Nuk ka qenë asnjë që ka dashur ta largojë. Na është dashur shumë. Unë e doja, por ai nuk donte të rrinte çfarë të bëj. Është si puna e nuses, që vete e kërkon, ti e do, por ajo s’të do”.
