Një ndeshje që duhej fituar me cdo kusht, por që me 0-0 e fiksuar në fërshëllimën e trefishtë finale në Loro Borici nuk lë asnjë të kënaqur, ndoshta dicka më shumë Partizanin, që kaloi i pamundur sfidën e fundit direkte me Vllazninë, duke i mbajtur shkodranët një pikë prapa në renditje.
Vllaznia dhe Partizani nuk shkuan më shumë se një barazim pa gola në javën e 30 të Superiores. Ndoshta për vetë faktin se luhej një copëz Europe e bëri që ndjeshmëria për këtë përballje të ishte e lartë. Sfida nisi me një ritëm të lart që në fillim, me Skukën që gjeti rrugën e rrjetës në minutën e 8’, por gjyqtari Xhaja dhe më pas VAR-i e akorduan si të parregullt. Frika e pësimit të golit dhe paniku për të qenë në një situatë kur duhet të rikuperohej rezultati i topitën të dy formacionet që nuk arritën të ndërtonin shumë raste për shënim e jo më të shënonin gola.
Epidosi më i nxehtë i pjesës së dytë ishte penalltia e pretenduar në minutën e 80’, kur pengimi i Latifit në zonë solli protestat e vendasve që shpresonin te 11 metërshi: edhe në këtë rast Xhaja dhe më pas VAR-i vazhduan lojën. Skuadrat nuk lëvizin në renditje, me Partizanin që qëndron në vendin e katërt dhe Vllaznia një pikë prapa, duke dështuar të vinin nën presion Kukësin e vendit të tretë, që duhet ende të luajë me Lacin, përpara publikut në inaugurimin e stadiumit të ri.
