Emri i këngëtares Bleona Qerreti në listën e kandidatëve të Këshillit Kombëtar të PD-së shkaktoi mjaft reagime një ditë përpara Kuvendit Kombëtar të kësaj force politike.
Pasi emri i saj u lakua në mediat online, këngëtarja ka vendosur të bëjë një reagim në lidhje me këtë çështje.
Përmes një postimi në Instagram ajo shkruan se nëse do të punonte ndonjëherë për një qeveri, do të ishte vetëm për atë të Shteteve të Bashkuara të Amerikës, duke e cilësuar veten si “qytetare amerikane.”
“Ndërsa kam lindur në Shqipëri jam një qytetare amerikane! Unë e dua Shqipërinë por besnikëria ime është ndaj Shteteve të Bashkuara të Amerikës – vendit tim!!
Nëse do të punoja ndonjëherë për një qeveri, do të punoja vetëm për qeverinë e Shteteve të Bashkuara të Amerikës!”– shkruan Qerreti që postimin e saj e ka shoqëruar me një flamur amerikan.
Pëlqimin e ka dhënë edhe Richard Grenell një nga këshilltarët kryesorë të ish-presidentit amerikan Donald Trump. Nuk dihet se si emri i saj përfundoi në listat e PD-së. ©LAPSI.al
