Një tjetër "shtëpi bari" është zbuluar nga policia në Valbonë, Tropojë. Pas kontrolleve, policia ka zbuluar një ambient të përshtatur për kultivimin e kanabisit, me anë të llambave, në një banesë në të cilën kishte lidhje të paligjshme të energjisë elektrike. Pronari i banesës është shpallur në kërkim, ndërsa elektricisti i zonës u procedua në gjendje të lirë për veprën penale "Shpërdorimi i detyrës".
"Në kuadër të këtij operacioni u bë i mundur lokalizimi dhe ndërhyrja në banesën e shtetasit Sh. S., ku u evidentua se njëra prej dhomave ishte përshtatur për të kultivuar bimë narkotike, me anë të llambave, që furnizoheshin me lidhje të paligjshme të energjisë elektrike. Në këtë ambient, shërbimet e Policisë gjetën dhe sekuestruan fidanë të dyshuar narkotikë kanabis, 500 gramë lëndë të dyshuar narkotike kanabis, 34 llamba dhe pajisje të ndryshme elektrike, që shërbejnë për kultivimin e bimëve narkotike në ambiente te mbyllura", informon policia.
Policia nuk gjeti njeri në banesë ndaj bëri shpalljen në kërkim të 43-vjeçarit Sh. S., banues në Valbonë, për veprat penale "Kultivimi i bimëve narkotike" , "Prodhimi dhe shitja e narkotikëve" dhe "Vjedhja e energjisë elektrike". Elektricisti nën hetim është shtetasi Q.B., 59 vjeç, banues në Shoshan.
Materialet procedurale iu referuan Prokurorisë pranë Gjykatës së Shkallës së Parë Tropojë, për veprime të mëtejshme.
