4 parti të krahut të majtë në Francë kanë rënë dakord në parim për të krijuar një aleancë për të sfiduar presidentin Emmanuel Macron në zgjedhjet parlamentare të qershorit.
Socialistët, të Gjelbrit, Komunistët dhe partia e ekstremit të majtë “Franca e papërkulur” e Jean-Luc Mélenchon arritën në një projekt-marrëveshje pas negociatave gjatë gjithë natës.
Mélenchon, i cili dështoi të merrte pjesë në balotazhin presidencial në prill, po kërkon tashmë shumicën e deputetëve. Të gjitha palët e përfshira e përshëndetën marrëveshjen si historike.
Udhëheqësi i Partisë Komuniste Franceze, Fabien Roussel, tha se asnjë parti në të majtë nuk mund të fitojë e vetme kundër Macron. Pavarësisht dështimit në garën presidenciale, partitë shpresojnë të jenë në gjendje të bllokojnë axhendën legjislative të Macron duke fituar shumicën e vendeve në Asamblenë Kombëtare.
Natyra e fragmentuar e së Majtës në Francën moderne është fajësuar gjerësisht për dështimin e ndonjë prej kandidatëve të saj për të hyrë në raundin e dytë të zgjedhjeve presidenciale të muajit të kaluar.
Më i suksesshmi, Mélenchon fitoi 21.95% të votave në raundin e parë, por u mposht nga e djathta ekstreme Marine Le Pen. Socialistët, të cilët morën presidencën për herë të fundit në vitin 2012, panë që pjesa e tyre e votave të raundit të parë ra në nivelin më të ulët historik prej 1.74%, me kandidaten e tyre Anne Hidalgo.
Partia Socialiste dikur dominuese, së bashku me të Gjelbërit dhe Komunistët, ka rënë pas partisë së ekstremit të majtë të Jean-Luc Mélenchon, i cili doli në garën presidenciale si lideri më popullor i së majtës franceze.
Nëse marrëveshja shkon përpara, do të thotë se në vend që të konkurrojnë kundër njëri-tjetrit në zgjedhjet parlamentare, socialistët, të gjelbërt, komunistët dhe mbështetësit e Melenchon do të ndajnë një kandidat për çdo zonë zgjedhore, duke rritur kështu në masë të madhe shanset e tyre.
Është ëndrra e Mélenchon që të jetë në gjendje t'i imponojë Presidentit Macron një shumicë parlamentare që do të bllokonte sistematikisht reformat e tij. Që nga gara presidenciale, ai është i padiskutueshëm si lider i së majtës. ©LAPSI.al
