Gazment Bardhi mendon se PD duhet të bëhet pjesë e procesit për përzgjedhjen e kreut të ri të shtetit edhe pse Rama thjesht kërkon të sajojë një proces farsë pasi votat i ka për ta zgjedhur, madje edhe emrin e presidentit të ri.
Në mbledhjen e sotme të grupit parlamentar për këtë cështje, mësohet se Bardhi ka propozuar që secili prej deputetëve të bëjë propozim me shkrim dhe më pas të gjitha qëndrimet të mblidhen në një dokument që të miratohet nga grupi parlamentar.
Pak a shumë të veprohet si në rastin e grupit të PS-së, ku deputetët shkruan kandidaturat në zarf.
“PD duhet të bëhet pjesë e procesit të përzgjedhjes së Presidentit vetëm me rregulla të qarta, të paracaktuara dhe që garantojnë që PD nuk do jetë fasadë në këtë proces. Ne duhet të dalim me nje qëndrim me shkrim, dokument me shkrim që i paraqitet palës tjetër, që përfshinë dy komponentë: kriteret e përzgjedhjes dhe procedura e përzgjedhjes. Tek procedura ne duhet të propozojmë rolin që do të ketë opozita. Nëse pranohen rregullat e procesit, vetëm atëherë ne mund të përfshihemi në diskutime dhe propozime konkrete.
Nëse nuk pranohet roli i opozitës në proces, atëherë qartësisht Edi Rama nuk dëshiron një President konsensual. Unë propozoj që secili prej nesh të bëjmë propozime me shkrim dhe ju z. Kryetar të përmblidhni qëndrimet në një dokument që më pas miratohet nga grupi dhe i paraqitet palës tjetër.
Çështja e Presidentit është çështje që duhet të diskutohet nga grupi parlamentar. Asnjë forum tjetër nuk mund ti imponohet grupit parlamentar. Ato që sot thonë nuk duhet të diskutojë grupi, deri dje thoshin duhet të mblidhet grupi dhe të diskutojë”, mësohet se ka thënë Gazment Bardhi.
