Kryeministri Edi Rama ka reaguar në lidhje me deklaratat e tij në Asamblenë e PS-së për SPAK-un. Pas akuzave të opozitës për sulme ndaj SPAK, Rama shprehet se për të dhe PS, Prokuroria e Posaçme e ka derën të hapur. Megjithatë ai shton se nuk do të heshtë, duke kërkuar që ky institucion të mos godasë njëanshmërisht.
“Të qeshësh e të qash me lot! Paskam kërcënuar SPAKUN sipas nongratave që betoheshin se edhe Flota e Shtatë Amerikane po t’i drejtonte tytat nga Lalzi nuk do ta votonin Reformën në Drejtësi! Për mua e për #PS SPAKU rron e punon pa gajle 100 vjet dhe bujrum, derën tonë e ka hapur!
Por gojën nuk kemi për ta mbyllur, që SPAKU të mos godasë njëanshmërisht, po gjithanshmërisht! Roli i mumjes, përballë rreshtit të gjykatësve e të prokurorëve, që Vetingu i nxorri katran me bojë apo mbi dosjet e skandaleve legjendare të krimit shtetëror, nuk mund të tolerohet më!”, shkruan Rama në Twitter.
