Ambasadori rus në Poloni, Sergei Andreev është gjuajtur me bojë të kuqe teksa ai përpiqej të shkonte te memoriali i ushtarëve rusë, në ditën e fitores kundër nazizmit. Gjatë rrugës për në ceremoninë që mbahej në Varshavë, Andreev u përplas me disa protestues. Protestuesit polakë e ndaluan ambasadorin rus përpara se ai të hynte në varreza dhe e qëlluan me bojë dhe objekte të tjera.
Ne duar tubuesit mbanin flamurin e Ukrainës dhe bërtisnin drejt përfaqësuesit rus thirrjet: “fashist” “Ukraina e lirë”, “Ndal luftës”. Për shkak të incidentit delegacioni rus nuk mundi të hynte te varrezat e ushtarëve rusë dhe u shoqërua jashtë zonës së rrezikut me ndihmën e autoriteteve policore.
