Tirana e Shehi akoma së bashku. Tani nuk ka më dilemma, kërkesat e teknikut janë konsideruar në linjë me klubin dhe kështi presidenti Halili ka bindur teknikun të qendrojë. Për firmën është punë ditësh, por tashmë është e sigurtë se bashkëpunimi do të vazhdojë. E konsoliduar kjo është nga manovra e bardhbluve, që pasi kishin mbajtur peng kontratën e përfunduar të Najdovskit, kanë përshpejtuar negociatat duke konkluduar marrëveshjen me maqedonasin.
Mbrojtësi, i aftë të luajë edhe në qendër të mesfushës, ishte një nga lojtarët në skadencë kontrate bashkë me Tosevskin, ndërsa për Tolin ka startuar rinovimi automatik, duke qenë se kontrata e tij ishte 2 plus 1. Për anësorin nuk do të ketë gjithashtu asnjë problem, me drejtuesit që do të ulen të bisedojnë rinovimin në ditët në vijim.
Në këtë mënyrë, dy kushtet e Shehit janë përmbushur, një kontratë e denjë për një trajner profesionist, por ku paratë janë të fundit që kanë rëndësi dhe ruajtja e grupit, me mbajtjen e lojtarëve që u shpallën kampion. Për firmën, Shehi e Halili do të ulen brenda kësaj jave ndoshta, por në të dy anët filtron siguria për një bashkëpunim edhe në sezonin e ardhshëm, madje më gjatë akoma, sepse kontrata me teknikun nuk do të jetë 1 vjecare.
E pasi të përfundojnë këto veprime burokratike, do të mendohet për merkaton, ku piketat tekniku i ka dhënë, për të ndërtuar një skuadër që jo vetëm të dominojë në vend, por të bëjë figurë të mirë edhe në ndeshjet ndërkombëtare.
