Një marrëveshje me vlerë gati 20 milionë, blerja e dytë më e shtrenjtë e Lazios nga Lotito, një zhgënjim i madh përfundimtar. 49 paraqitje me bardhekaltrit me vetëm një gol të shënuar. Numrat e Vedat Muriqit si zëvendës i Immobile janë të pamëshirshëm dhe ndarja në merkaton e kaluar dimërore ishte e nevojshme. Rilindja në La Liga, me fanellën e Mallorcas, i ka dhënë jetë të re sportivisht gjigantit kosovar. Golat dhe asistimet që i sollën një shpëtim fantastik klubit të Mallorcas dhe i dhanë gjithashtu titullin e lojtarit më të mirë të muajit maj në La Liga. Tani vullneti i klubit spanjoll është i qartë: të blejë përfundimisht Piratin, por vetëm me një zbritje në çmim.
"Merkato e janarit është shumë e komplikuar dhe menduam se Muriqi ishte një profil ndryshe nga ai që kishim ne. E vërteta është se në fund mbetëm të mrekulluar me të. A do të qëndrojë këtu? Siç e thashë edhe më parë jemi shumë të kënaqur me performancën e tij dhe përfshirjen e tij dhe do të shohim nëse mund ta bindim të qëndrojë. Ky është qëllimi ynë edhe pse Mallorca e ka shumë të vështirë të paguajë 10 milionë euro për një lojtar". Të qarta fjalët e Pablo Ortells drejtori sportiv i Mallorcas. Muriqi është shumë i pëlqyer në Spanjë dhe klubi dëshiron të vë bast mbi të, por në kushte të caktuara. Ndaj Lazio do të përpiqet të plotësojë kërkesat e spanjollëve pa rënë megjithatë nën një shumë të caktuar, për të mos bërë një humbje të konsiderueshme.
Në pritje për të mësuar se cila do të jetë e ardhmja e tij, Muriqi ka folur nga grumbullimi i kombëtares së Kosovës, për të folur se cila do të jetë e ardhmja e tij e afërt. Pirati duket se i ka të qarta idetë dhe nuk ka dyshime se çfarë do të ndodhë në javët e ardhshme: "Tani nuk mendoj për të ardhmen time. Jam plotësisht i fokusuar te kombëtarja. Kam kontratë me një ekip, do të paraqitem në grumbullim dhe më pas do të marr një vendim”.
