Policia e Durrësit ka dhënë detaje nga aksioni anti-drogë i zhvilluar në portin e këtij qyteti mbrëmjen e së mërkurës. Burimet zyrtare thanë se janë zbuluar dhe sekuestruar 45.5 kilogramë lëndë e dyshuar narkotike kokainë.
Sipas bluve të Durrësit, pas informacioneve që dispononte Policia Kriminale, është ushtruar kontroll i detajuar në një kontejner të ngarkuar me mish pule, që ishte nisur tranzit nga Brazili, për llogari të një subjekti tregtar në Maqedoninë e Veriut ndaj dhe operacioni është koduar me emrin “Tranziti”.
Droga ishte ndarë në 40 pako të ambalazhuara me foto filmash vizatimorë dhe të fshehura në mishin e pulës. Grupi hetimor, nën drejtimin e Prokurorisë së Durrësit vijon veprimet për dokumentimin e plotë kësaj veprimtarie kriminale, identifikimin dhe kapjen e personave të përfshirë në të.
Materialet do t’i kalojnë Prokurorisë pranë Gjykatës së Rrethit Gjyqësor Durrës, për veprën penale “Trafikimi i lëndëve narkotike”, por ende nuk flitet për të arrestuar. ©LAPSI.al
