Kryeministri i vendit Edi Rama është në një takim me kryebashkiakët e të gjitha qyteteve ditën e sotme, në kuadër të decentralizimit dhe performancës financiare të qeverisë vendore. Gjatë fjalës së tij, Rama është shprehur i pakënaqur me të gjitha bashkitë në përgjithësi për të cilat tha se po bashkëjetojnë me borxhe dhe nuk po rrisin buxhetin e bashkisë me anë të të ardhurave nga tregu. Ai tha se do të merren masa në rast se këto të fundit nuk përmbushin detyrimet financiare.
Kreu i qeverisë theksoi se siç ndodh ne vende të tjera të botës, nëse nuk menaxhohen mirë financat qeveria do të marrë në administrim bashkitë.
“Bashkitë duhet të organizojnë aktivitetin e tyre financiar fitimprurës. Është krejtësisht i mundur. Do vetëm vullnet, vizion dhe ekspertizë. Janë të gjithë në dispozicion dhe këto gjëra mund të bëhen. Ne do të marrim masa në rast të mos përmbushjes së detyrimeve financiare në raport me disiplinën financiare, si bën gjithë bota, siç ndodh në Francë dhe Itali kur bashkitë shkojë në kolaps, duke marrë bashkinë në administrim. Siç bëmë me pastrimin do të vijojmë dhe me disiplinën buxhetore. ”, tha Rama.
