Asnjë garë, asnjë rikthim në ujë për Anita Alvarez, sinkronetën amerikane që të mërkurën rrezikoi të mbytet gjatë ushtrimit individual të lirë në Kampionatin Botëror të Budapestit. Mjeku i Fina-s nuk i dha autorizimin 25-vjeçares, për të garuar me skuadrën e saj. Vajza ishte jashtë rrezikut që në mbrëmje, pas kthimit në hotel, iu nënshtrua ekzaminimeve të kujdesshme, u qetësua nga e ëma dhe nga stafi mjekësor dhe teknik i kombëtares amerikane, por u përjashtua nga konkurimi dhe për të Botërori ka përfunduar. “Isha e shokuar nga fotot ku isha pa ndjenja nën ujë, por më pas i pashë nga ana pozitive. Tani mendoj se fotot janë të bukura në një farë mënyre. Të shoh veten ashtu nën ujë, kaq të qetë, kaq të palëvizshme dhe duke parë Andrean (trajneren spanjolle Fuentes) duke u zhytur me krahun e shtrirë duke u përpjekur të më arrinte, si një superhero, më bëri një farë efekti”.
MJEKJA- Mjekja amerikane, Selina Shah, sqaroi: "Është një vendim që e ka marrë Fina. Unë kam ofruar të gjitha materialet mjekësore, nga e kaluara deri tek ato të fundit. Ne u përpoqëm të jemi gjithëpërfshirës. Sipas mendimit tim, ajo mund të konkurronte. Unë isha e bindur për këtë. Ajo ndihej e bindur se mund të konkuronte. Ajo ishte kthyer në normalitet. I kishte bërë të gjitha testet të cilat i dhanë aprovimin. Edhe teste private (personale), që i organizuam dhe i përgatitëm vetë. A ka dhënë Fina shpjegime përse nuk mund të garonte? Nuk jam në dijeni. Cfarë do të bëjmë? Kur të kthehemi në shtëpi do të mundohemi të kuptojmë cfarë ndodhi".
