Seanca e sotme në Gjykatën e Apelit për deputetin Ervin Salianji është shtyrë për 18 korrik. Salianji është paraqitur pranë gjykatës në shoqërinë e disa deputetëve të tjerë demokratë: Luciano Boçi, Flamur Noka, Saimir Korreshi etj. Kujtojmë se Salianji është dënuar me 1 vit burg nga Gjykata e Shkallës së Parë sa i takon çështjes 'Babale', për vprën penale kallëzim i rremë. Sipas tij seanca është manipuluar nga një dëshmimtar i rremë, ndërsa deputeti thotë se ka besim që do të shpallet i pafajshëm.
“ Seanca u manipulua nga një dëshmitar i rremë. Vonesa dhe sorollatjet janë të përhershme sa herë që një person kërkon drejtësi. Ankimi është i plotë, janë te gjithë elementet. Nuk ka pasur vepër penale. Në rastin tim unë kam paraqitur prova për të paraqitur para publikut dhe për të provuar pafajësinë time. Jemi në një rast që duket sikur është i koklavitur, por është shumë e thjeshtë. Unë nuk kam bërë kallëzim, por një denoncim për një të dënuar. Pjesa e investigimit të gazetarit është e njohur për publikun, sesi të gjithë drejtuesit e lartë politikë ishin të përfshirë në një çështje ku kërkonin të involvonin një dëshmitar të rremë, një personazh që sot i ka marrë paratë e veta nga qeveria dhe sot ishte dakord edhe me burgun që ka bërë”, tha Salianji.
