Tirana e nis me humbje aventurën në Champions League, duke u mposhtur 1-0 në transfertën me Dudenlange, rezultat që megjithatë lë të hapur kualifikimin për në kthim. Një rezultat i pranueshëm, duke qenë se është minimal, por për mënyrën si u materializua, duhet ti djegë shumë Shehit e bardhebluve, që shpenzuan gjithcka në tre minuta, kur morën kartonin e kuq të Limaj dhe pësuan golin e Hasan, ndanj luksemburgasve që luanin në inferioritet numerik që nga minutë e 54.
Pasiguritë e një skuadre që ka harruar ti japë vetes besim janë shfaqur barrierë e pakalueshme për kryeqytetasit, që vuajtën në pjesën e parë, në të cilën zgjodhën të mbroheshin me kujdes, pavarësisht se ishin skuadra favorite në përballjen me Dudenlange. Vendasit provuan me Gashin e Sinanin, pa rrezikuar gjithësesi seriozisht Bekajn, ndërsa Tirana preferoi kundërsulmin. Edhe atë pa cinizmin e duhur.
Në pjesën e dytë u duk se gjërat mund të ndryshonin, kur Xhixha në minutën e 53 u shfaq për herë të parë vetëm përballë Foks, por gaboi konkluzionin. E megjithatë, një minutë më pas Kirch mori kartonin e dytë të verdhë, duke lënë Dudenlange me 10 lojtarë. Edhe në superioritet Tirana nuk e fundosi goditjen, madje pak i ngacmoi luksemburgasit, që rikthyen ekuilibrin numerik në minutën e 68, duke përfituar nga gafa e Limajt (humbi topin e bëri faullin për të verdhën e dytë). Vetëm tre minuta iu deshën pastaj Dudenlange të ndëshkonte Tiranën me goditjen me kokë të Hasan që vendosi fitoren 1-0.
Tani gjithcka do të diskutohet në kthim, kur rezultati lejon të shpresosh, por loja jo. Shehi duhet të bëjë krejtësisht ndryshe për të shkuar në takimin me Cluj në raundin e dytë të Champions, përndryshe i pret një zbritje "kategorie" në Conference aspak prestigjoze për pritshmëritë e bardhebluve.
