Parmaku nuk mbajti dhe rrëzimi ishte i pashmangshëm. Alessandro Gentile, basketbollisti dhe ish-kapiteni i Olimpia Milanos, mbeti viktimë e një aksidenti në shtëpi teksa ishte me pushime në Formentera me të dashurën e tij Vanya, vëllain e tij Stefano dhe disa miq.
“Jam gjallë për mrekulli, vërtet nuk kam fjalë të tjera për të përmbledhur atë që më ndodhi – shpjegoi Gentile – Nuk mbajti parmaku prej druri i tarracës së vilës që mora me qira për disa ditë pushime, dhe rashë poshtë duke bërë një fluturim pak a shumë prej katër metrash. Isha mbështetur në këtë parmak, kur papritur u gjenda poshtë. Një goditje e pabesueshme, humba edhe ndjenjat”.
Basketbollisti ka pësuar një frakturë të vertebrës cervikale dhe mund të ketë nevojë për ndërhyrje kirurgjikale. Gentile, aktualisht pa ekip pas eksperiencave të tij të fundit mes Vareses dhe Brindisit, u dërgua me helikopter në spitalin e Palma de Mallorcas. Atje, ai kaloi natën e të dielës para se të dilte nga spitali të hënën në mbrëmje.
Në Instagram ai ka dashur t'i qetësojë të gjithë: "Në orët e fundit ka dalë një lajm shumë alarmant për gjendjen time shëndetësore. Do të doja t'i siguroja të gjithë duke thënë fillimisht se jam mirë. Fatkeqësisht, gjatë kohës që isha me pushime isha viktimë e një aksidenti në shtëpi. Asgjë serioze. Falenderoj këdo që ka pasur një mendim apo një mesazh për mua dhe më vjen keq që u shqetësuat".
