Dy koka derri të prera dhe një shënim me kërcënime janë gjetur mëngjesin e sotëm para shtëpisë së presidentit të U.S Lecce, avokatit Saverio Sticchi Damiani dhe pranë zyrës së tij ligjore në Leçe. Mbi ngjarjen kanë nisur menjëherë hetimin agjentët e Kuesturës dhe karabinierët. Koka e prerë, ende e gjakosur dhe e vendosur në një pako, u zbulua nga kujdestari i godinës mëngjesin e sotëm.
Dy muaj më parë një tjetër episod i frikshëm kishte prekur familjen e Unionit Sportiv të Leçes. Me atë rast, një letër me përmbajtje intimiduese i është dërguar Luciano Barbettas, një sipërmarrës i njohur në sektorin e tekstilit dhe një anëtar i ri i klubit.
