Një nga të paktët raste kur Edi Rama nuk ka mbështetjen e plotë nga ndërkombëtarët është fiksuar sot nga kamerat e ERTV-së. Diplomatët e lartë europianë e goditën sot simbolikisht Ramën në takimin për amnistinë fiskale.
Ambasadorja e Francës Elizabet Barsac dhe ai i Gjermanisë, Peter Zingraf ishin ulur në rreshtin e parë të të ftuarve në takimin e organizuar nga qeveria për amnistinë fiskale.
Dy ambasadoret para se ta merrte fjalen Rama
Lexo me tej:
Presioni ndërkombëtar po shantazhon trafikantët që të tremben nga amnistia e Ramës
Ata kanë dëgjuar të flasë ministren e Financave, Delina Ibrahimi, zv.kryeministrin Arben Ahmetaj dhe një barrister nga Britania e Madhe për amnistinë, specifikat e ligjit dhe përfitimet nga nisma.
Por sapo fjala iu dha Edi Ramës, ambasadorja franceze i ka bërë një shenjë atij gjerman. Të dy janë çuar në këmbë dhe kanë braktisur takimin, sikur ta kishin bërë me fjalë më herët.
Ky moment është kapur nga regjia e kryeministrisë, që është përpjekur ta shmangë largimin demonstrativ të ambasadorëve.
Rama duket se ka mbetur keq dhe pas një pauze disa sekonda ka nisur t’u flasë ambasadorëve në mungesë. Në fjalën e tij, kryeministri ka kërkuar respekt nga ndërkombëtarët, që nuk mund ta trajtojnë Shqipërinë si një vend armik.
"Miqve dhe partnerëve europianë dua t’u them që respekti reciprok është ai që me respekt mund të refuzohet çdo ide, por ta trajtosh Shqipërinë si një vende armiqsh, ndërsa amnistia është bërë në të gjitha vendet që na japin mësim, kjo nuk është asgjë e drejtë, asgjë e duhur që tregon respektin pa kushte që ka Shqipëria ndaj partnerëve të saj" u shpreh kryeministri në fjalën e tij.
FMN “shuplakë Ramës: Amnistia fiskale do pastrojë para të pista
Ndërkombëtarët janë kundër amnistisë fiskale, që rrezikon të pastrojë paratë e krimit dhe korrupsionit, por reagimet e mëparshme të dhomave të tregtisë Rama i ka quajtur "fletërrufe" dhe u ka kujtuar vendeve europiane se edhe vetë ato kanë aplikuar më parë amnisti fiskale.
Pas zhurmës që u bë në shtyp dy ambasadorët, ajo franceze dhe ai gjerman, kanë sqaruar se pse u larguan nga takimi i amnistisë fiskale, pikërisht në momentin që Edi Rama mori fjalën.
Në sqarimin e tyre, Elisabeth Barsacq dhe Peter Zingraf, thonë se të dy kishin takime disa minuta më vonë dhe nuk mund të qëndronin dot. "Ne e lamë sot në mëngjes takimin për amnistinë fiskale sepse të dy kishim takime. Ne ndajmë plotësisht pikëpamjet e shprehura nga Delegacioni i BE-së", thuhet në reagimin përbashkët të ambasadorëve.
Por si referimi që ata i bëjnë Komisionit Europian që paralajmëroi se amnistia fiskale "do të dobësojë kontrollin kundër pastrimit të parave si dhe do përbëjë një rrezik thelbësor për reputacionin e vendit" si përkimi i takimeve të tjera pikërisht në atë moment si dhe nervozizmi i Ramës pas largimit, të lënë të mendosh se bojkotin nuk qe fare i pafajshëm.
©Lapsi.al
