Gjykata e Fierit do të shqyrtojë sot çështjen e Klodian Çalamani, 38-vjeçarin që abuzoi seksualisht dhe më pas vrau në mënyrë makabre 8-vjecarin Mateo Vasiu. Në ambientet e jashtme të Gjykatës janë edhe familjarët e të miturit, ndërkohë që shoqërimi i Çalamanit do të bëhet nën masa të rrepta sigurie, për të shmangur çdolloj incidenti. Në 15 qershor Prokuroria e Rrethit Gjyqësor Fier përfundoi hetimet dhe dërgoi për gjykim të pandehurin Klodian Çalamani i akuzuar për veprat penale “Marrëdhënie seksuale ose homoseksuale me të mitur me dhunë” dhe “Vrasja në rrethana të tjera cilësuese ndaj të miturit”.
Mateo po luante me biçikletën e fqinjit të tij në rrugët e fshatit Greçalli të Fierit, kur u rrëmbye dhe u vra nga fqinji i tij, në 16 nëntor të vitit të kaluar. Ngjarja e rëndë u zbulua pas kontrolleve të policisë, të cilët gjetën trupin e 8-vjeçarit të groposur në oborrin e banesës së Çalamanit.
