Është identifikuar në Itali rasti i parë i një pacienti të infektuar nga Centaurus, nënvarianti më i ri i Covid 19 i njohur me simbolikën BA 2.75. Lajmi është bërë i ditur nga Instituti Superior Italian për Shëndetin Publik e i verifikuar në periudhën javore 11-17 korrik 2022. Preokupimi i virologëve italianë është se niveli i lartë i infektueshmërisë së këtij nënvariant mund të jetë problematik gjatë vjeshtës së 2022.
Në tabelën javore të kurbës pandemike, në Itali konfirmohet se Omicron është varianti dominues tek personat e infektuar e se virusi është në një fazë tranzicioni. Koeficienti i prekshmërisë mbetet i lartë por në reduktim në krahasim me dy javët e fundit. Drejt stabilizimit është dhe koeficienti i pacientëve që kërkojnë kurim spitalor në repartet Covid e në ato të terapisë intesive. Shqetësues shfaqet fenomeni i riinfektimi i pacientëve Covid-19. 12.6% e personave pozitiv nga virusi pandemik, janë të riinfektuar për të disatën herë. Në nivel kombëtar, mesatarisht Italia shënon në këtë fundjavë 727 të infektuar në cdo 100 mijë banorë.
Autoritetet shëndetësore italiane vazhdojnë të rekomandojnë masat parandaluese për qytetarët e kanë autorizuar nisjen e vaksinimit të dozës së katërt për personat 60 vjec e sipër. Ndërkohë të dhënat e monitorimit Covid gjatë 24 orëve të fundit shënojnë 244 viktima e në rritje në krahasim me një ditë më parë e që regjistroi 199 viktima.
