2 iranianë me shtetësi gjermane janë ndaluar nga drejtoria e anti-terrorit në policinë e shtetit të hynë në vendin tonë. Burime të lapsi.al thanë se Afshin Kalantari dhe Soltani Batool janë ndaluar në aeroportin e Rinasit ku kanë qëndruar prej 72 orësh.
Pas verifikimeve atyre u është kërkuar të kthehen mbrapsht në Gjermani. Të njëjtat burime thanë se 2 iranianët e kanë kundërshtuar vendimin e autoriteteve shqiptare për të mos hyrë në vendin tonë.
Shkak për ndalimin e hyrjes së tyre ishte se ata ishin ftuar nga një shoqatë e quajtur “ASILA” e krijuar për të ndihmuar iranianët që jetojnë në Shqipëri. Pjesë e kësaj shoqate janë ata që kanë dezertuar nga kampi MEK në Manzë të Durrësit.
Ky vendim i autoriteteve shqiptare vjen në vazhdën e hetimeve të nisura nga SPAK për një celulë spiunazhi të Iranit në vendin tonë.
Një tjetër zhvillim ka qenë anulimi i një samiti që do të mbahej në Manzë të Durrësit dhe një sulm kibernetik ndaj autoriteteve shqiptare për të cilën dyshohet se mund të fshihen hakera nga Irani. ©LAPSI.al
