Dalin detaje të reja nga hetimet e nisura pas denoncimit të familarëve për zhdukjen e Ervis Martinajt. Mediat raportojnë se prokuroria ka nisur një hetim për rrëmbim personi për 40-vjeçarin që ishte në kërkim ndërkombëtar mbi bazën e një urdhër-arresti nga SPAK.
Sipas të njëjtave burime hetuesit kanë iniciuar disa kontrolle banesash në Vlorë, Tiranë dhe Laç, por pa rezultat. Në bazë të dëshmisë së familjarëve janë ushtruar kontolle në disa banesa që dyshoheshin si baza ku fshihej Martinaj.
Mësohet se pas këtyre verifikimeve po kryhen përgjime dhe vëzhgime të personave që dyshohet se mund të kenë pasur kontakte me Martinajn. Një nga qytetet ku janë përqendruar hetimet është Vlora.
Hetimet nisën pas kallëzimit të Faik Martinaj, xhaxhait të 40-vjeçarit të shumëkërkuar, i cili denoncoi humbjen e kontakteve me nipin dhe ngriti dyshime se mund t’i ketë ndodhur diçka e keqe për shkak të përplasjeve që ka me grupe kriminale që kanë interes ta eliminojnë.
Pistat e hetimit janë të hapura, nga njëra anë ka dyshime se ngjarja mund të jetë inskenuar nga vetë Martinaj për t’u shpëtuar kundërshtarëve dhe policisë, nga ana tjetër nuk rrezohen as dyshimet se mund të jenë përpara një ngjarje kriminale.
