Do të duhet shumë kohë dhe shumë durim, por Sebastian Haller po punon për t'u rikthyer në fushë. Pas tronditjes së zbulimit të tumorit malinj në testikul dhe operacionit të mëpasshëm, blerja e re e Borussia Dortmund ka rifilluar aktivitetin fizik duke rinisur stërvitjet. Ëndrra e tij dhe e të gjithë tifozëve verdhezinj është që të rikuperohet sa më shpejt dhe të kthehet në fushë për fillimin e vitit të ardhshëm.
Historia në Instagram e publikuar nga bashkëshortja e sulmuesit franko-Ivorian, në të cilën shihet Haller pa flokë, për shkak të kimioterapisë, por i buzëqeshur, i cili stërvitet në palestrën e tij personale në shtëpi me uniformën e Dortmundit, është ngushëlluese në këtë kuptim, ashtu siç ishte pak ditë më parë edhe mesazhi që u erdhi shokëve dhe tifozëve në ditën e prezantimit të skuadrës: "Përshëndetje të gjithëve. Siç e dini nuk mund të jem i pranishëm sot - ishin fjalët e tij në një video të projektuar në ekranet e mëdha të stadiumit - Unë e vlerësoj shumë mbështetjen tuaj, mezi pres të luaj para jush dhe 'murit të verdhë'. Shpresoj që sezoni të fillojë mirë, do t'i ndjek ndeshjet! Ju uroj më të mirat."
Sezoni, në fakt, ka nisur në mënyrën më të mirë të mundshme, me dy fitore në dy daljet e para, e tashmë të gjithë presin rikthimin e Haller në fushë.
