Tirana ndoshta nuk mori gjithcka kishte menduar nga aventura europiane, e mundur në Champions e Conference nga Dudenlange e Zrinjski Mostar, por thesari i ardhur në arkat e klubit nga shitjet është i të gjithë prestigjit. Seferi, Toli e Totre, tre lojtarë të transferuar në dritaren verore të merkatos, që kanë mbushur arkat e bardhebluve me 900 mijë euro, pas akordit të kampionëve të Shqipërisë me ukrainasit e Vorskla Poltava.
Transferimi i Ardit Tolit shtoi 100 mijë euro të tjera për Tiranën, kur klubi zyrtarizoi marrëveshjen e transferimit, edhe pse dihej që përpara avaneturës europiane se lojtari ishte në dalje. E nëse mendohet si një lojtar kyc i kryeqytetasve në sezonin e kaluar, duhet kthyer koka pak më pas, kur xholi bardheblu ishjte krejtësisht i panjohur dhe mori vlerë nga tekniku që këmbënguli ta kishte në formacion, duke e aktivizuar në të majtë të mbrojtjes, apo edhe në mesfushën me tre.
Tekniku bardheblu pati largpamësinë të evidentojë vlerat e larta teknike të një lojtari si Enur Totre, edhe pse vinte nga 6 muaj inaktivitet në Maqedoni. Bast i vënë e i fituar nga tekniku e Tirana, për një lojtar me parametër zero e i transferuar pas dy sezonesh për 300 mijë euro. Në këtë pikë, Osmani nuk është penduar aspak që dëgjoi sugjerimin e teknikut të tij për të firmosur me mesfushorin.
Taulant Seferin kishte mbi vete shumë skepticizëm e mes pagës së lartë e negociatave me Young Boys, duhej guxim për të sjellë te Tirana. Megjithatë, sulmuesi me Shehin jo vetëm u shpluhëros, por rigjeti edhe kombëtaren shqiptare, duke kulmuar me 19 gola të sezonit të kaluar, që e rritën vlerën e kartonit të tij në 500 mijë euro.
900 mijë euro, një thesar i vërtetë, nga ato që rrallë inkasohen në hyrje nga klubet shqiptare e që kujtojnë kohët kur Skënderbeu i dikurshëm manovronte në merkato.
