Një ndeshje dramatike në kuptimin e parë të fjalës në Loro Borici. Vllaznia ka mundur Kukësin 2-1 me finale emocionuese, ku pak sekonda pasi VAR i anulloi penalltinë Herald Marku shënoi golin e fitores. Një ndeshje e cuditshme ku shkodranët mund të udhëhiqnin me goleadë, deri kur pësuan barazimin e Zivkovic, me Kukësin që kishte mundësi edhe ta fitonte ndeshjen.
Shkodranët dominuan pjesën e parë dhe goli i shënuar nga Heriç ishte rrjedhoje e një loje ofensive e cila pa ekipin vendas të godiste dy herë, në fillim traversën e më pas shtyllën. Shkodranët koleksionuan rastet, duke gabuar rregullisht përpara Tafas, kur Kukësi ishte inekzistent, vuajti zotërimin e topit të kundërshtarit dhe nuk arriti asnjëherë të ishte i rrezikshëm me përjashtim të goditjes me kokë të Gyasi.
Lëvizjet e Gegës me aktivizimin e Zivkovic dhe hyrjen e Kotes ndryshuan situatën dhe goli i kroatit në krosimin e Gyasi i dha tjetër drejtim ndeshjes. Shkodranët u fikën, ndërsa Kukësit mund të kishte shënuar edhe golin e avantazhit në fund me Peposhin. Shtesa e ndeshjes solli dramën e vërtetë. Fillimisht kuqeblutë panë t’u anulohej një penallti pas ndërhyrjes së VAR e më pas erdhi goli në limite i Markut, që vulosi tre pikët e para për ekipin e Josës.
